SeputarPati.Com-Ing desa Tambah
Agung Kecamatan Tambakromo Kabupaten Pati Jateng, ana sawenehe petilasan kang
uga sinebut pundhen utawa makam Pangeran Teposono ( Mbah Selamet). Makam kuwi
rada mencil mapan ana ing tengah sawah, sanajan katon wingit nanging sakupenge
patilasan katon resik.
Durung
suwe iki penulis, mecaki dalan tumuju makam Pangeran Teposono malah kaminujon
ketemu karo sawijine perangkat desa Tambah Agung Sugiyanto banjur entuk keterangan
sing gumathok ngenani makam Pangeran Teposono. Nanging penulis diprayogakake
yen kepingin luwih mangerteni babagan makam kasebut amrih ketemu karo Bapak Rinduan Aziz minangka
sesepuh kang uga Kyai misuwur sing daleme ana desa Mojomulyo.
Miturut
katerangane KRT. K.M Rinduan Aziz
Pujonogoro (57) marang penulis mratelakake, Pangeran Teposono sawijining
priyayi saka Mataram putrane Panembahan Senopati, dhene urut-urutane silsilah saka Brawijaya V nurunake putra
R.M.Bondan Kejawen nawangsih, peputra Ki Ageng Getas Pendawa, nurunake Ki Ageng Selo sabanjure peputra Ki Ageng
Henis, peputra Ki Ageng Pemanahan saka Ki Ageng Pemanahan nurunake Panembahan
Senopati sabanjure peputra Pangeran Teposono (Mbah Selamet).
Nalika
jaman kerajaan Mataram, Panembahan Senopati nugasake marang putrane Pangeran
Teposono, kanggo dadi telik sandi ing wewengkon Kadipaten Pati sisih lor Jawa
amerga jaman semono kuwi Pati karo mataram rada kisruh. Ing jrone mlakune
tumuju Kadipaten Pati Pangeran Teposono dumadagan dikepung dening mungsuh,
saengga dheweke ngupakara nyelametake awake saka kepungan mungsuh.
Sabanjure
Pangeran Teposono nggolek papan singidan sinambi nggawa tongkat ing panggonan
sing rinasa sepi..”Wusanane dheweke bisa selamet uwal saka pangubere para mungsuh, mula banjur saka prastawa
kasebut dijenengake Mbah Selamet lan panggonan sing kanggo umpetan nalika dikepung mungsuh dijenengake dhukuh
Kluwung nganthi seprene kang ana ing desa Tambah Agung,” critane KRT.K.M.
Rinduan Aziz Pujonogoro kang uga Pimpinan Ponpes Darul Muqoddas kasebut.
Amerga
Pangeran Teposono bisa ngleksanake tugase, saka Panembahan Senopati didhadeke
pimpinan perang, sawise banjur ditawani jabatan nanging dheweke milih ngumbara,
lelana sinambi nggiyarake/siar Agama Islam, kanggo kamulyane umat manungsa. Pungkasane
Pangeran Teposono utawa mbah Selamet netep ing wewengkon dhusun Kluwung
Ing
Makame Pangeran tepososo isih katon prasaja banget, ana sacedhake makam kasebut
uga diwangun omah-omahan nyepake kanggo para peziarah lan ing njerone wis
dicepakake klasa wis gelaran ditata urut tembok. (Didik.A)
Tags
Sejarah